"EL MIO PRIMER VOCABULARIU" EN LLANGRÉU

La Casa’l Conceyu de Llangréu acoyó la presentación de la campaña de normalización social del asturianu "El Mio Primer Vocabulariu, vocabulariu básicu de la Llingua Asturiana n’imáxenes". Ye una campaña que busca "afalar l'usu del asturianu ente los neños y neñes más mozos del conceyu y concienciar al profesoráu y a les families de la importancia d'usar l'asturianu nos primeros años de vida".
Esta nueva iniciativa del Conceyu de Llangréu va empobinada "a les escueles de 0 a 3 años y a los primeros cursos d’educación infantil, y consiste nun vocabulariu básicu n’imáxenes pa que los más pequeños y pequeñes vayan conociendo y familiarizándose con términos y pallabres venceyaes a la so rodiada más cercana: el so cuerpu, la ciudá, la escuela, el parque, el bañu, los colores y les formes xeométriques, y la so casa".
Esta campaña desendólcase al traviés de siete modelos diferentes de cartelos a tou collor con dibuxos del prestixosu diseñador Alfonso Zapico, estos cartelos presenten un vocabulariu básicu n’imáxenes d’unos 200 términos d’usu frecuente y cercanu a lo más mozo de la casa. Los cartelos compleméntense con fiches en blancu y negru pa pintar que permiten trabayar de forma entretenida esti proyeutu.

EDUCACIÓN INFANTIL N'EUSKERA

L'euskera ye la llingua cimera na Educación Infantil nel País Vascu. El decretu aprebáu esti añu regula les competencies y habilidaes que debe alquirir un neñu na etapa d'Infantil, ente los 0 y los 6 años, nos centros de la rede educativa vasca. El documentu fixa l'euskera como llingua vehicular cimera nel ámbitu escolar, como lo fai'l currículum vascu pa los ciclos de 6 a 16 años. Ye una condición con repercusiones llimitaes si nun s'afita una regulación más concreta que siñale les hores de clas en cada llingua oficial.

Los modelos llingüísticos, A, B, y D, entá continúen en vigor y son los colexos los que deciden el númberu d'hores que dediquen a cada idioma. El decretu regulará les destreces y habilidaes que han deprender los neños fasta los 6 años y les actividaes que tienen qu'ufiertar los centros. El documentu detalla les competencies cimeres a trabayar colos pequeños como llograr l'autonomía nes sos actividaes, desendolcar les sos capacidaes emocionales y afeutives, deprender a rellacionase colos demás, y algamar les habilidaes comunicatives, llóxico-matematiques y de llecto-escritura.